Utanríkisráðuneytið samþykkti í september beiðni Hjálparstarfs kirkjunnar um styrk til að halda áfram þróunarsamvinnu í sveitahéruðum í Rakai- og Lyantonde-umdæmum í Úganda. Styrkurinn gerir Hjálparstarfi kirkjunnar kleift að starfa áfram með staðbundnu hjálparsamtökunum RACOBAO að því að bæta lífsskilyrði munaðarlausra barna og fólks með HIV/alnæmi sem býr við örbirgð og er útsett fyrir misnotkun og félagslegri útilokun. Markmiðið með starfinu er að fólkið hafi bjargráð og aukið þolgæði gagnvart sjúkdómnum og neikvæðum afleiðingum hans.
Styrkur ráðuneytisins, rúmar 65 milljónir króna, svarar til 80 prósenta af kostnaði við verkefnið næstu fjögur árin eða til loka árs 2025. Á þeim tíma verða múrsteinshús reist fyrir 32 fjölskyldur með um 130 börn sem og vatnssöfnunartankar, útikamrar og eldaskálar sem reistir verða við hlið húsanna. Ráðgjafar vinna með fjölskyldunum sem fá fræðslu um smitleiðir HIV og annarra sjúkdóma. Auk þess fá áttatíu fjölskyldur geitur, verkfæri og útsæði til ræktunar svo þær geti bætt fæðuöryggi sitt og afkomumöguleika. Öll aðstoðin er veitt í samráði við íbúana á svæðinu.
Samstarf Hjálparstarfs kirkjunnar og RACOBAO (Rakai Community Based AIDS Organization) nær aftur um 20 ár. Í skýrslu samtakanna um starfið fyrri hluta ársins 2021 kemur fram að Covid-19 hafi haft neikvæð áhrif á líf fólks í Úganda eins og annars staðar en fyrstu tilfellin í landinu voru greind í mars 2020. Takmarkanir vegna faraldursins hafa haft slæm áhrif á afkomu bænda sem lifa af sölu landbúnaðarafurða þar sem mörkuðum var lokað og bannað var að flytja fólk, dýr og afurðir milli svæða. Fátækt hefur því aukist á verkefnasvæðinu vegna heimsfaraldursins sem og kynbundið ofbeldi og vanræksla barna. Þrátt fyrir faraldurinn og samkomutakmarkanir hefur RACOBAO þó tekist að halda starfinu áfram af fullum krafti.
„Stuðningurinn skiptir gríðarlegu máli. Þegar fjölskyldurnar hafa fengið húsaskjól og aukið aðgengi að vatni og hreinlætisaðstöðu fá þær tækifæri til að hefja ræktun. Með ræktun verður fæða þeirra fjölbreyttari. Með fjölbreyttari fæðu verður heilsan betri og með tekjum af sölu afurða aukast líkur á að börnin geti sótt skóla og fengið menntun. Með aukinni menntun minnka líkur á að stúlkur verði gefnar barnungar í hjónaband og eignist börn á unglingsaldri. Og þannig verður vítahringur sárafátæktar rofinn,“ sagði Bjarni Gíslason framkvæmdastjóri Hjálparstarfs kirkjunnar þegar hann tók við styrknum frá ráðuneytinu.